Robert C. Dejon | June 14, 2022
Patay diha-diha dayon ang osa ka manindahay og isda human gitadtad og rapido sa mga wala pa hiilhing suspetsado pasado 6:20 sa buntag niadtong Martes, Hunyo 9, didto sa Purok 3, Brgy. Libertad, Ormoc City.
Ang biktima giila nga si Crisanto Pescador, 44 anyos, minyo, self-employed, og lumolupyo sa Brgy. San Vicente, ning syudad.
Sa pagpakighinabi ni Case Investigator Police Cpl. Mark Jun Caballes, siya nagkanayon nga nakadawat sila og tawag gikan sa pipila ka mga concerned citizens kalabot sa matod pa pagpamusil. Miresponde gilayon ang kapulisan ngadto sa naasoy’ng dapit og didto ila naabtan ang biktima nga wala nay kinabuhi nga luwan sa iyang tora-tora.
Dason pa ni Caballes, pinaagi sa mga saksi sa maong pagpamanhig, nga ang biktima ang nagmaneho sa iyang tora-tora og paingon nga maghatod og isda ngadto sa direksyon sa lungsod sa Merida og Isabel dihang nahitabo ang maong pagpamusil. Usa ka itom nga Toyota Avanza nga walay plaka ang ilang nakita nga kusog nga mikagiw human ang pagpamusil.
Ang kapulisan ang nagkanayon nga ang biktima ang nadakpan sa osa ka buy-bust operation didto sa lungsod sa Isabel niadtong 2017 apan nakagawas human ma-aprobahi ang iyang aplikasyon sa plea bargaining agreement niadtong 2018.
Unom (6) ka mga kabhang sa kalibre 5.56 nga mas nailhan nga armalite rifle ang nakuha sa mga sakop sa Ormoc City Police Office - Scene of the Crime Operatives (OCPO - SOCO).
Ang kapulisan milunsad gilayon og hot pursuit operation og checkpoints sa tanan chokepoints duol sa nahitaboan sa krimen. Ang mga sakop usab sa Police Station 1 ang mihimo na og imbistigasyon labot sa pagpatay sa maong negosyante.
Comentários