Robert C. Dejon | June 22, 2022
Parehas nga wa nay kinabuhi ang duha ka manag-uyab dihang nakit-an kini sa managlahing lugar didto sa Calbayog City niadtong Martes, Hunyo 14.
Unang nakit-an mao ang lawas ni Jade Andre Bestudio, 20, ulitawo, estudyante og lumolupyo sa Purok 7, Brgy. Hamorawon sa Calbayog mga 10:30 ang takna sa buntag didto sa sioton nga bahin kilid sa diversion road sa Brgy. San Policarpo sa naasoy nga siyudad. Dugoon ang lawas og adunay pinusilan sa ulo. Sa pagproseso sa mga sakop sa SOCO sa crime scene, nakuha ang usa (1) ka kabhang sa cal.45 pistol nga maoy gigamit aron patyon ang biktima.
Ang kapulisan nga miimbistigar nakakuha og impormasyon nga kauban sa biktima ang hinigugma niini nga nailhan nga Roan Jeallen Lamparas, 23, dalaga, maestra og residente sa Brgy. Gadgaran sa Calbayog. Nasayran nga si Bestudio ang mikuha diay kang Lamparas didto sa Mercury Drug Store sa Brgy. Capoocan aron ihatod pagpauli ngadto sa Gadgaran.
Sanglit gipaniguro sa kapulisan nga makit-an si Lamparas sanglit mao man kini ang maisip nga katapusang nakit-an nga kauban sa biktima.
Nianang mga alas 8:33 sa gabie sa samang adlaw, Hunyo 14, usa ka tawag gikan sa bag-ong napili nga konsehal sa Calbayog ng si Jessie Gianan ang mitaho sa kapulisan labot sa nakit-an nga patay’ng lawas sa usa ka babae didto gihapon sa naasoy’ng diversion road apan sakop na sa Brgy. Bagacay.
Dali nga miresponde ang kapulisan og didto misugat sa ilang panan-aw ang biktima nga wala nay sapot ang ubos nga parte sa lawas niini. Nakompirmar usab nga ang maong patay’ng lawas iya kang Lamparas.
Gidala gilayon sa usa ka punerarya ng patay’ng lawas sa gipatay nga maestra alang sa post mortem examination ug nasayran nga gipasipad-an ang pagka-babaye niini.
Ang kapulisan sa dakbayan sa Calbayog ang padayon pa nga nangita sa mga wa pa mailhing mga suspetsado aron mahatagan ug hustisya ang pagkamatay sa manag-uyab nga nagplano na unta nga magpakasal.
コメント