Elvie Roman-Roa | October 23, 2022
Tulo (3) ka mga bata ang nakalas samtang 2 ang naangol human gidaro sa usa ka multicab mga alas 6:30 sa gabie niadtong Oktubre 14 didto sa Maharlika Highway sa Tambis 2, Poblacion, Lungsod sa Tabango.
Ang mga nakalas giila nga silang Mark Christian Suchetza, 14; John Ric Bolaño, 14; og Mico Batiquin, 15. Samtang ang mga naangol og gidali og dala sa tambalanan mao sila Francisco Gupio, 16 og Bryce Noble Franca, 19.
Ang multicab nga nakadasmag gimaneho sa usa ka Eleazar Beduya, 33 anyos og taga Brgy. Tinghub, Villaba, Leyte. Siya usa ka branch manager sa usa ka funeral service.
Sa inisyal nga imbestigasyon ni Case Investigator Police Corporal Glenn Belongilot, nasayran nga ang mga bata ang nagduwa og Mobile Legends daplin sa dalan dihang mikalit lang og dasmag ang naasoy nga multicab. Kinaham nga tambayanan sa mga bata ang maong lugar sanglit kusog ang signal didto.
Tungod sa kakalit og kakusog sa maong pagbangga, patay diha-diha silang Suchetza og Bolaño samtang gidali gilayon pagdala sa mga mirespondeng rescuers silang Gupio, Franca, og Batiquin. Apan, nabugtu-an si Batiquin sa iyang kinabuhi usa pa miabot sa tambalanan.
Ang mga igsuon ni Batiquin nga silang Nico, 12 og Marga, 8 ang nakaangkon usab og angol apan wala na gikinahanglan nga iospital.
Dason pa ni Belongilot nga ang mga biktima magpartidos lang og anaa nanimuyo duol sa nahitaboan sa aksidente.
Dugang impormasyon nga nakuha nga ang driver nga si Beduya ang gikan sa usa ka party og pauli na gikan sa Lungsod sa San Isidro. Sumala pa ni Belongilot, giangkon ni Beduya nga nakainom kini og nakatagpiyong samtang nagmaneho nga miresulta sa maong aksidente.
Sa kahadlok nga dumogon siya sa mga taga didto, miikyas siya sa nahitaboan sa aksidente og boluntaryong misurender sa kapulisan.
Giandam na ang mga kaso batok kang Beduya. Basi sa ilang pakisusi sa Department of Justice (DOJ), si Belongilot mibutyag nga regular nga kaso lamang ang mamahimong ipasaka batok sa driver.
Pursigido ang pamilya sa mga biktima nga mapahamtangan og saktong silot si Beduya aron mahatagan og hustisya ang kalit nga kamatayon sa mga bata. LP with reports from Elvie Roman-Roa.
Comentários